ვლადიმერ პუტინი - რუსეთის მისამართით ყველანაირ მუქარას კონტრპროდუქტიულად და საზიანოდ ვთვლით

04-03-2014
რუსეთის წინააღმდეგ დაწესებული სანქციების შედეგებზე პირველ რიგში მათ უნდა იფიქრონ, ვინც ამ სანქციების დაწესებას აპირებს. ამის შესახებ რუსეთის პრეზიდენტმა ვლადიმერ პუტინმა განაცხადა.
"ვფიქრობ, რომ თანამედროვე სამყაროში, როცა ყველაფერი ურთიერკავშირშია და ყველა ერთმანეთზეა დამოკიდებული, რა თქმა უნდა, შესაძლებელია ერთმანეთისთვის ზიანის მიყენება, მაგრამ ეს ორმხრივი ზიანი იქნება და ამაზეც უნდა ვიფიქროთ", - განაცხადა რუსეთის პრეზიდენტმა.
ამასთან, ვლადიმერ პუტინმა აღნიშნა, რომ რუსეთის პარტნიორებმა მხარი დაუჭირეს ლეგიტიმური ხელისუფლების დამხობას და ეს ადამიანები ლეგიტიმურად გამოაცხადეს.
"ასეთ სიტუაციაშიც კი ჩვენ მოთმინებით სავსე ვართ და მზად ვართ თანამშრომლობისთვის. არ გვინდა კონტაქტის გაწყვეტა უკრაინის იმ ხელისუფლებასთანაც კი, ვისაც ლეგიტიმურად არ მივიჩნევთ. რუსეთის მისამართით ყველანაირ მუქარას კი კონტრპროდუქტიულად და საზიანოდ ვთვლით", - აღნიშნა ვლადიმერ პუტინმა.
ამასთან, რუსეთის პრეზიდენტმა განაცხადა, რომ ქვეყანა კვლავ ემზადება "დიდი რვიანისთვის" და მზად იქნება კოლეგების დასახვედრად, მაგრამ ვისაც არ უნდა ჩასვლა, ნუ ჩავა.


http://www.interpressnews.ge/ge/msoflio/272523-vladimer-putini-rusethis-misamarthith-yvelanair-muqaras-kontrproduqtiulad-da-sazianod-vthvlith.html